Jan Hendrik van der Westhuizen op sy beste

 “Jan, my Franse kosverhaal”, vertel die storie van Jan Hendrik, die boerseun van Middelburg, en sy kos reis vanaf Mpumalanga tot in Nice Frankryk, waar sy restaurant “Jan”, so suksesvol is dat dit onlangs met ‘n Michelinster beloon is – ‘n eerste vir ‘n Suid-Afrikaner.

Vir ‘n Afrikaanse boerseun om soveel sukses te behaal in ‘n Europese land, en dan nog Frankryk ook, die middelpunt van die kosbedryf, verg “guts”. Waarmee Jan Hendrik duidelik met emmersvol gesëen is.

Wanneer mens die boek deurblaai, is dit nogal interessant om op te merk hoeveel van sy moederland hy werklik behou het.  Nartjie panacotta, gaan jy sekerlik nie baie in Europa te ete kry nie, so ook nie biltong en tjipsbroodjies nie.  Sy croquembouche, sit hy  aan mekaar met ‘n melktertvulsel so reg uit ‘n boerekombuis.  Madeleines, so tipies Frans soos ‘n stylvolle mademoiselle, geur hy met boegoe  van alle dinge.

Jan Hendrik gee by elke resep ‘n aanduiding van die moeilikheidsgraad van die gereg.  Heelwat van hulle is gemerk as “maklik”, wat hoop gee vir ons “mere mortals”.

Dus ‘n wonderlike kookboek om te besit en te gebruik.  Soveel ander boeke koop mens net om ongebruik op die rak te bly staan.  Hierdie ene motiveer mens egter, om soveel as moontlik geregte daaruit te (probeer ?) maak.

Die boek kos R403,00 by Exclusive Books.

Ek het solank twee van die resepte uitprobeer.  Onverbeterlik lekker was die resultaat!  Probeer gerus – hier is die resepte:

4 medium-grootte ryp vye

15ml suiker

15 ml heuning

300g skilferkorsdeeg

Sout

Varsgemaalde swart peper

160g bloukaas

• Voorverhit oond tot 180° C
• Sny stingels en onderkante van vye af, en halveer horisontaal
• Smelt suiker en heuning saam met ‘n titsel water oor stadige hitte tot dit begin karameliseer
• Sny die skilferkorsdeeg in sirkels so groot soos ‘n medium muffinpanholte
• Spuit of smeer die muffinpannetjie
• Verdeel die suikermengsel eweredig tussen die holtes
• Bedek met ‘n halwe vy
• Geur met sout en peper
• Bedek die vy met ‘n skilferkorssirkel en vou dit om na binne asof jy dit met ‘n kombers toemaak
• Bak vir so 20 minute tot die deeg goud-bruin is
• Laat staan vir 5 minute in die pan
• Verwyder die tertjies versigtig met ‘n lepel uit die pan en plaas dit met die deeg onder op ‘n bak of hout bord
• Breek stukkies bloukaas oor en bedien warm of koud
• Indien warm, plaas tertjies vir so 5 minute in die oond totdat die kaas gesmelt het

7 eiers

460g suiker

480g koekmeelblom

15 ml bakpoeier

310g botter, gesmelt

80ml olyfolie

skil van 5 suurlemoene en sap van 1

60ml papawersaad (poppyseed)

• Voorverhit oond tot 180°C
• Spuit 2 ronde koekpanne met kleefwerende kossproei
• Klop die eiers en die suiker saam tot lig en donsig
• Sif die meel en bakpoeier saam en vou by die eiermengsel in.  Meng deeglik
• Meng die gesmelte botter, olyfolie, suurlemoenskil en sap en laat staan dit vir ‘n paar minute voor jy dit by die meelmengsel invou
• Meng tot glad en voeg dan die papawersaad by
• Verdeel die beslag gelykop tussen die twee panne
• Bak vir so 25 minute of tot gaar en goudbruin
• Laat afkoel en haal uit pan

Versiersel

1 bakkie roomkaas

Skil en sap van 1 suurlemoen

± 250ml versiersuiker

• Meng die roomkaas en die sap van die suurlemoen
• Sif die versiersuiker bietjie-bietjie by tot die verlengde styfheid verkry is
• Smeer oor die koek
• Versier met stukkies suurlemoenskil

Dit is ‘n baie groot koek – ek het die een laag gevries.  Jan-Hendrik, gebruik eintlik die koek as basis vir ‘n kaaskoek, maar dit is net so lekker op sy eie as ‘n grootkoek.