Ground Zero, New York

Nuwe WTC bedek met wolke

Geen mens behoort New York te besoek sonder om ook ‘n draai by “Ground Zero”, die plek waar die World Trade Centre (WTC) eens gestaan het, te maak nie.

Dit hele tragedie is steeds vir my so half ‘n persoonlike belewenis.  Al was ek nie daar nie, het ek letterlik die hele tragedie lewendig op TV sien afspeel.

Die middag van 11 September 2001, net voor ek sou huis toe ry, skakel my vriendin Julie, en sê ek moet bietjie op TV kyk as ek by die huis kom, want sy sien op die internet dat daar  ‘n vliegtuigie in die World Trade Centre vasgevlieg het.  Ons woon mos darem immers naby die kantoor.

By die huis gekom sit ek die TV aan, net om te sien hoe die tweede vliegtuig in die Suid-toring vasvlieg.

Van daar af die hele verskrikking meegemaak, gesien toe die torings val en al die ellende wat daarmee gepaard gegaan het.

Eerste gewaarwordinge

My eerste gewaarwording toe ons op die terrein kom, was dat daar nie veel te sien is nie – die plek is dan so “leeg”… 

My broer Stephan wat Ground Zero ‘n paar jaar gelede besoek het, sê hy het dieselfde gevoel gekry, tot hy in die eerste gedenkpoel kyk en besef dat dit eintlik presies is waaroor dit gaan – daar is nie veel te sien nie, want waar eens die twee reuse toringgeboue van 110 verdiepings elk  gestaan het, is daar letterlik nie ‘n klippie  van oor nie.

DIT RUK MENS NOGAL.

Die oggend toe ek en Susan, my dogter, daar kom, was die weer miserabel, yskoud, met ‘n motrëentjie en wind.  Toe ons so opkyk na die nuwe WTC, ook 110 verdiepings soos sy voorgangers, besef ons toe regtig eers hoe hoog die torings werklik was - die bo-punt van die gebou was letterlik onder die wolke.

Op die presiese buitelynafmetings van die ou torings, uitgegrawe tot op die bodem, is twee gedenkpoele met watervalletjies opgerig met die name van die oorledenes in die tragedie op die buitelyne in koper uitgegraveer.

Meer as 3000 name.

Die brandweermanne wat in die tragedie vermoor is

Die New Yorkse brandweermanne is sekerlik die groot helde van die tragedie – bykans 300 van hulle sou op die ou einde sterf in hulle gesukkel om die werkers uit die brandende geboue te red.

Ons gidse

Die twee gidse wat ons rondgeneem het, het albei noue verbintenisse met die WTC gehad.

Die gidse is baie gesteld op die feit dat die slagoffers vermoor is, en nie net oorlede is nie.  Op die doodsertifikate is die oorsaak van dood immers aangegee as “homicide”.

Die eerste het vir jare in die Noordtoring gewerk.  Die tweede se suster se kantoor was in die Noordtoring, bo die 93e tot 99e wat deur die vliegtuig getref is.  Hyself het in ‘n poskantoortjie, net oorkant die sentrum, gewerk. 

Die hyser-en trapskagte in die Noordtoring is onmiddellik so beskadig en die vlamme was so hewig, dat geen mense van verdiepings hoër op, gered kon word word nie.

Die tweede gids vertel, sonder enige emosie, hy gee net die feite, dat hy sy suster probeer skakel het, maar daar was nie antwoord nie. 

Sy het ook nie weer huis toe gekom nie.

Oorblywende peerboom

Slegs ‘n enkele boom op die terrein het die tragedie oorlewe.  Dit staan dus bekend as die “survivor tree” .

 Baie gehawend, met stukkende wortels en verwronge takke, is die peerboom uitgegrawe en na ‘n kwekery geneem ten einde dit te probeer red. 

Nege jaar later, in 2010, het dit so herstel en floreer dat dit weer op dieselfde plek op die terrein herplant kon word.

Met splinternuwe, gesonde takke, wat oor die jare weer gevorm en gegroei het, word dit gesien as  ‘n simbool van “resilience, survival and rebirth.”

Laaste staaf wat uit die rommel verwyder is

Die museum beslaan so sewe verdiepings onder die grond.

Die inhoud word baie feitelik weergegee, om nie onnodig emosies op te wek nie.

Heelwat artikels van werkers wat in die rommel ontdek is, is te sien, soos selfone, skoene, handsakke en selfs dele van ‘n vliegtuigvenster.  Ook die lapelwapentjie van ‘n lugwaardin wat in die rommel gevind is.

Die verstaanbare, absolute chaos tussen Burgerlugvaart en Verdediging

Dat daar absolute chaos geheers het is seker te verstane, want niemand het geweet wat besig was om te gebeur nie.

Kyk na hierdie ongelooflike video met die werklike gesprekke tussen die mense in die beheertorings op die lughawens en die Lugmag.