Boottoere?

Onse boot, die Norwegian Star

Die Amerikaners spot graag met boottoere (cruises), as sou dit wees vir die “newly-wed, near dead and the underfed”.  Na my eerste en enigste boottoer  onlangs, begin die gesegde nogal sin maak.

Ons boottoer was met ‘n Amerikaanse boot, die Norwegian Star, op die Baltiesessee na Skandinawië, Duitsland en Rusland.  Die bemanning was van oral oor die wêreld, maar die passasiers meestal Amerikaners.

Kyk so ‘n boot kan sekerlik ‘n romantiese plek wees – staar saam met jou geliefde na die sonsondergang met ‘n glasie wyn in die hand, hmmm – kan net lekker wees.

Maar ook vir mense met jong kinders is dit ideaal.  Daar is oppassers en vermaak vir die kleingoed sodat die ouers op dagtoere kan gaan, in vrede eet, en sekelik ‘n bietjie slaap inhaal.  Daar was tot babas aan boord.

Tipiese galgehumor van die Amerikaners, maar daar steek sekerlik waarheid in.

So ‘n boot is baie gebruikersvriendelik vir hoogsbejaarde persone wat moeilik loop, mense in rolstoele en so aan.  Daar was ook ‘n goeie mediese komponent met twee dokters, verpleegsters en so aan aan boord.

Ek het my nog altyd voorgestel dat mens, wanneer jy nou nie meer so lekker kan of baie wil loop en rondflenter nie,  jou  op so ‘n bootreis moet begewe.

Elke aand aan boord mooi aantrek vir ete, saam met jou geliefde ‘n glasie wyn drink en ‘n heerlike vyfstermaaltyd geniet.  Die toppunt van elegansie en romantiek.  So iets nostalgies soos mens altyd in die flieks sien van ‘n vervloë  era met reise op die ou Union Castlebote, die Titanic en so aan.

Daar op die Baltiesesee is daar ook heelwat van die land te sien terwyl die boot vaar.  Groot inhamme soos reuse fjords waardeur jy vaar om by Stockholm, St Petersburg en so aan uit te kom.  Jy hoef dus nie eers van die boot af te klim om darem steeds iets interessants te sien nie.

Die Norwegian Star roem hom op “freestyle dining”. DIt beteken jy kan enige tyd gaan eet, hoef nie plek te bespreek nie en kan sit waar jy wil. 

EN met 11 restaurante sal jy nie honger ly nie. 

By van die spesialisrestaurante soos die Franse Bistro en Japannese Restaurant moet jy egter iets ekstra betaal om daar te kan eet.  Maar dit is eintlik sonde, want daar is gratis etes beskikbaar vir elke smaak – ‘n 24 uur buffet, en elegante ala carte plekke om van te droom.

Ons het ook twee wonderlike wynproëe aan boord bygewoon, aangebied deur die boot se sommelier .  ‘n Vergelykende proe van bv. Chardonnay van die ou-wêreld met die nuwe soos Chili en Australië. 

Niks van Suid-Afrika nie  – duidelik nog baie bemarking om te doen in die passasiersbootindustrie.

St Petersburg teen skemer

So ‘n manier van reis is eintlik baie ekonomies, want dit sluit in al jou vervoerkoste tussen lande, akkommodasie, etes en vermaak. 

As mens ‘n goeie ontbyt eet, is dit selfs nie eers nodig om middagete op ‘n ekskursie op land te eet nie.  Jy’s nie regtig honger nie, ons het maar net iets kleins geëet om die verskillende lande se disse (en bier), te proe.

Tee en koffie en koeldrank is gratis aan boord en sap by ontbyt.  Wyn en bier, daarenteen is peperduur want jy betaal in dollar of euro.

So as jy nie bier of wyn drink nie, het jy regtig nie baie uitgawes op so ‘n toer nie – net bietjie sakgeld.

Die dagekskursies  wat die boot aanbied is duur, en nie so goed soos dié wat Van Dyktoere vir ons 30 Suid-Afrikaners gerëel het nie.  Ons het wonderlike plaaslike gidse op elke dagtoer gehad. 

Ek het van die Amerikaners op die boot hoor kla dat hulle byvoorbeeld nie veel van St Petersburg gesien het op die dagtoer wat deur die boot gerëel is nie – ‘n kanaalvaart en besoek aan die Hermitage Museum.  Daarenteen het ons Peterhof, die Tsar se somerspaleis (so ‘n uur se ry buite die stad), besoek, ‘n tradisionele Russiese ete met vodka, bortsch en so aan in ‘n hotel beleef, ‘n rit op die metro, ‘n kanaalvaart, die Hermitage Museum ens. 

Dit alles vir heelwat goedkoper as wat die boot se dagekskursies bied.  Goeie waarde vir geld.

Elke aand is daar ook een of ander vermaak in die boot se teater aangebied.  Die aand in St Petersburg bv ‘n Russiese geselskap met tradisionele danse, sang en ballet wat uitstekend was.

Bortsch - tradisionele Russiese beetsop.

Of ek weer op ‘n boottoer sal gaan?  Defnitief as dit van land tot land ry soos op die Baltiese –of Middelandsesee. 

Maar weet darem nie van die daelange vaarte op see soos tussen Europa en Australië of die VSA waar jy die heeltyd net op die boot is nie.  Eish, dis darem nou weer iets anders. 

Miskien as ek eendag vir die “near dead” kwalifiseer.