...as Sedoos gaan lê

"Hoe stil kan dit word as Sedoos gaan lê

Seker een van die mees ikoniese tonele in die wêreld.

 

"Hoe stil kan dit word as Sedoos gaan lê

wie kan dit mooier as die tortel sê
wie roerender assie bladstil bome
assie skewe verwaaide damwalbome
innie stil vroemôre as Sedoos gaan lê
 Boerneef

As verloopte Stellenbosser het die uwe vir die eerste keer in baie jare weer 'n paar weke gedurende Februarie in die Kaap deurgebring.  Dit was nou nogals soos die Ingelse sê 'n "eye opener".

Het al vergeet hoe erg die Suid-Ooster kan waai, of miskien is Stellenbosch effens meer beskut.  Maar kyk dan nou net na die video hier onder.  Dis erg man - die mense moet letterlik vashou om nie om te waai nie.

'n Paar windverwaaide Kapenaars

Van die boompies daar by Groenpunt en so aan groei permanent skeef, net soos in Port Elizabeth.  Staan nie 'n kans teen die krag van die wind nie.

Luister 'n bietjie hoe mooi sing Rozanne Botha met haar helder, vars stem oor die Kaapse dokter.

"Banting" is groot innie Kaap

TIm Noakes se dieet is op die oomblik absoluut 'n gier in die Kaap. 

Al wat 'n eetplek is het 'n paar 'banting" disse op die spyskaart, het selfs sulke ontbytdisse gesien by padstalle langs die pad by Worcester en Riversdale. 

Daar is selfs 'n restaurant in die Kaap wat daarin spesialiseer.  Mense verdring mekaar glo om plek te kry.  Orals word klaarvoorbereide disse verkoop of geadverteer.  Teen R60.00 per brood kan dit nogal betalend wees om die spulletjie te maak en van die hand te sit! 

Woolies verkoop "banting" rys en spaghetti.  Blykbaar word dit van blomkool gemaak.  Verneem van 'n familielid van my skoonseun dat selfs op 'n plekkie soos Greytown in KZN, die blomkool bykans onbekombaar is en daarby natuurlik peperduur soos die "bantingers" dit aankoop.

Bloubergstrand

"PInard on sea" Boutique Hotel in Blouberg.

Darem nie die heeltyd net in die Kaap gebly nie, ek en my broer Stephan het per motor na Glentana naby Mosselbaai gereis om vir ons ander twee broers en hulle gesinne te gaan kuier. 

Was dit tog nou heerlik om weer plekke soos Worcester en Robertson te sien!

Stephan woon In Bloubergstrand en het vir my vir Kersfees (heerlike laat geskenk), die eerste nag ingeboek in 'n pragtige gastehuis net langs die "On the rocks" Restaurant in Blouberg.

Die plek se naam is "Pinard on sea Boutique Hotel" en nader aan die see en rotse met die lieflike ikoniese uitsig op Tafelberg, gaan jy nie maklik kry nie!

Tydens hoogseisoen word die plek waar ek gebly het, as 'n suite met vier slaapkamers, groot oopplan sit-eetkamer en kombuis verhuur. In die stiltye as individuele kamers.  Ideaal vir 'n gesin.  Die gastehuis verskaf net koffie en beskuit, maar al die geriewe vir self kosmaak is daar, asook braaiplekke.  Daarby is die puik "On the rocks" Restaurant net langsaan.

 

Seekerse

In Pinard is daar van die interessantste kerse met 'n skulptema - maklik om te maak en regtig iets besonders!

Gebreekte skulpe as basis
Allerlei
Afsetgebied vir swartmosselskulpe

"Pitkos Padstal" anderkant Worcester

Roosterkoek met kaas en biltong

Op pad na Mosselbaai, ons het Worcester oor gery, was dit, snaakgenoeg, nogal opvallend hoe onduidelik en deurmekaar die Wes-Kaapse padaanwysingsbordjies, of tekort aan bordjies dan nou, is. 

Dit was plek-plek maar ''moge het treffe" om die regte pad te kry.

Net anderkant Worcester kry mens die "Pitkos Padstal".  Wat 'n wonderlike plek.  Bedien heerlike varsgebakte roosterkoek met kaas en biltong en koffiesakkoffie onder die bome.

Groot verskeidenheid wyne van omliggende kelders te koop, asook gebak en konfyte.  Het ook interessante plaaslik gemaakte likeure gekoop - vernoem na die ou Boeregeneraals, met smake soos heuningbos, rooibos, nartjie en neute.

Spesiale likeure

Glentana toe

"Sleeping beauty" of nie?

Sal altyd 'n sagte plekkie vir Robertson hê - ons ma en haar broer Jan, was daar op kosskool toe dit nou nog 'n Girls High en Boys High was.  Het hulle drie dae per trein geneem om van naby Deben, in die destydse Brits-Bechuanaland, daar uit te kom.

Dit was regtig opvallend hoeveel plekke langs die pad en ook in die Kaap, onder beurtkrag gely het.  Kry die eetplekkies regtig jammer, want hulle moet dan maar planmaak om wel iets te kan voorsit wat nie krag gebruik nie. 

Ons ma het as jong onderwyseressie op Riversdale skoolgehou en kon liries raak oor Stilbaai en die Riversdale se berge, met natuurlik "Sleeping beauty".

Moet bieg, kan nog steeds, na al die jare. nie regtig die sogenaamde slapende skone raaksien nie.  Kyk bietjie na die foto.  As mens van links af kyk lyk dit na 'n gesig met so 'n laang voorkop.  kyk van regs af en jy sien ook 'n gesiggie met 'n neusie, maar nou nie eintlik 'n skoonheid nie.  ??? 

Weet darem nie. 

So 'n entjie anderkant Riversdale, is daar ewe skielik 'n heerlike kruiereukie in die lug.  Kan nog steeds nie uitvind watter plant so ruik nie, maar dit is kenmerkend van Riversdale se veld.

Glentana

Ons deel van Glentana toe ons kinders was, oftewel Glentana Hills soos die deesdae bekend staan.

Die tuinroete bly darem maar mooi.  Met seker die beste klimaat in die land - minder wind en rëen as die Kaap self.  Daarby is die temperatuurverskil tussen somer en winter maar so 4 grade.

Die uitsig van die familie se twee strandhuise is onverbeterlik.  Erwe grens aan die hoogwatermerk.  Lieflike eeue oue melkhoutbome ook waaronder mens kan sit en kuier.

 

Glentana Hills in 2013.

Groot-Brakstasie

In ons kinderdae het daar heelwat treine op die heuwel bo Glentana geloop, maar deesdae is dit so afgeskaal dat die ou Groot-Brakstasiegebou in 'n restaurant verander is.

EN nie sommer so 'n restaurant nie, 'n smulplek!

 

Tuine nog net so mooi soos eers.
Varklende, oftewel "pork belly"
En hier is ons vier.

DIt bly darem steeds 'n groot voorreg om saam met mens se broers en hulle gesinne te kuier - mis dit vir niks!  Dit gebeur so maklik dat families uitmekaar uit spat wanneer die ouers eers oorlede is.

Write a new comment: (Click here)

SimpleSite.com
Characters left: 160
DONE Sending...
See all comments

| Reply

Latest comments

06.05 | 19:10

...
05.05 | 20:47

Het baie geniet. Dankie.Tuinmaak my passie. Meestal onbekende musiek vir my, maar pragtig.

...
07.04 | 20:46

Hi Nalene, watter datums het jy 'n probleem mee. Dié van Dr Nel van Heerden? Madelie

...
07.04 | 09:09

Kan iemand dalk sê die datums klop nie... Die datums wat op foto's is en die ouderdom wat sy behoort te wees, werk nie lekker saam nie. Kan iemand dalk help?

...
You liked this page