Virrie voëls...

Vetmuffins vir wilde vleisetende voëls.

Vleisetende voëls

Hier in die Noorde is die winters maar baie droog en hard, en sukkel die arme voëls om te oorleef - min natuurlike voedsel beskikbaar.  Hulle waardeer dit dan behoorlik as jy 'n bietjie moeite doen vir hulle, en dis natuurlik een groot plesier om hulle dop te hou as hulle eet. 

Daar is verskillende tipe voedings wat geskik is vir wilde voëls, dis nou vir vleisvreters, saadeters en suikerbekkies.

My vriendin Karin, met haar kenmerkende deeglikheid, het eers 'n hele studie gemaak van geskikte resepte vir hierdie voedings vir wilde voëls. 

Hier onder is een vir vetmuffins wat geskik is vir vleiseters en aansienlik goedkoper is as die bolle wat in die handel beskikbaar is.

Karin sien gereeld vleiloeries, kwêvoëls en so aan wat aan die muffins eet, maar maak jou gereed om dit daagliks te vervang in die winter - dis baie gewild.

Sommige mense sit dit sommer op die grond neer, maar pasop vir katte en honde soos Otto, ons Doberman - hy gaan dit beslis self verorber.  'n Houertjie wat aan 'n tak hang werk goed. 

Hang ook dennebolle aan die bome en druk stukkies vars vet daarin - heerlik vir hulle.  Moet net asseblief nie oorskiet vet wat klaar gesout is gebruik nie. 

Karin se vetmuffinresep vir vleisetende voëls

125 g Holsum

1 k growwe grondboontjiebotter

1 k meel

2 k mieliemeel

2 k hawermout

1/2 k bruinsuiker

1    Meng droë bestanddele saam 

2    Smelt Holsum en grondboontjiebotter

3    Meng alles deeglik

4    Bestuif 'n koppie binne met bietjie meel en maak dan 3/4 vol met die mengsel

5    Keer uit en laat goed droog en hard word  

Kommentaar:

Ek het my silikoonmaatkoppie vir die muffins op die foto gebruik.  Dit werk goed want die mengsel sit gladnie daarin vas nie.

Madelie

Kyk net hierdie oulike idee vir 'n saadvoedingsbottel wat sommer terselfdertyd herwinning bevorder.

Voeding vir saadvreters

Hierdie voedingsbottel is iets oorspronklik - weet nie wie se idee dit was nie. 

Wat ook baie goed werk is die soliede saadkëels wat deesdae orals te kry is. 

By Jasmyn by die Hartebeespoortdam kos hulle so R20.00, maar by ons naaste kwekery hier in Menlopark weer oor die R80.00 elk   :0(  Die këels is solied en bestaan uit suiwer saadjies en gelatien wat dit bind.

'n Voertafel met vars vrugte is net so gewild en lok weer ander soorte voëls.

Voeding vir suikerbekkies

En hier is die nektarbottel vir suikerbekkies.

Daar is oulike hangbottels in die handel te kry wat met 'n suikermengsel gevul word.

Maar wees net versigtig, dis belangrik dat die bottel elke dag of wat skoongemaak moet word en vars volgemaak word - die suikerstroop raak gou oud en is dan geneig om te begin gis.

Nektarstroop

1 deel suiker

4 dele water

Kook vir 'n paar minute nadat die suiker opgelos het om die stroop te steriliseer.

Ek voeg 'n druppel of twee voedselkleursel by net aan die begin om die voëltjies te lok.  Dis opsioneel.

'n Huisie vir houtkappers

Mens koop die huisies vir houtkappers by 'n kwekery. Dit is 'n hol stomp, seker van 'n garingboom of 'n sisal, met 'n plankie bo en onder vasgekap.  Langs die kant is 'n piepklein gaatjie waar die houtkapper kan begin kap.  Ons het, net onder die gaatjie, vir hulle 'n stokkie vasgelym sodat hulle gerieflik kan sit.
 
Binne 'n dag nadat ons die huisie in  die winter hoog in 'n jakarandaboom opgehang het, het 'n kuifkop begin kap en ingetrek.  Daar is twee van hulle, seker 'n broeipaar.  Hulle is gek daarna om op die stokkie te sit en die wêreld van daaraf te beskou.
Die tuit en prop van die bottel vir suikerbekkies. Die bruin affere is van plastiek.

Write a new comment: (Click here)

SimpleSite.com
Characters left: 160
DONE Sending...

Martie Lategan | Reply 04.03.2017 17.48

Sulke goeie raad - hierdie suster van ons stel nie net in mense-kos belang nie, maar ook kos virrie voëls, asook vir katte en honde!!

linda | Reply 15.01.2017 14.09

My man het vir ons een van daardie bottels gemaak wat hang vir die suikerbekkies. Hoekom stoot die water voor uit by tuit? Maak nie saak watter hoek hy hang nie

Madelie 16.01.2017 21.23

Linda, kyk onder "Virrie voëls" 'n foto van die tuit van die bottel gelaai. Ek het myne by 'n kwekery gekoop. Die tuit het 'n plastiekwaster wat styf oorpas.

Madelie | Reply 22.01.2016 20.50

Hi Johan,

Kyk asseblief op die blog se hoofbladsy vir 'n antwoord.

Madelie

Johan Smith | Reply 22.01.2016 11.49

Baie dankie vir die puik inligting, hoe maak `n mens die bottel self?

See all comments

| Reply

Latest comments

06.05 | 19:10

...
05.05 | 20:47

Het baie geniet. Dankie.Tuinmaak my passie. Meestal onbekende musiek vir my, maar pragtig.

...
07.04 | 20:46

Hi Nalene, watter datums het jy 'n probleem mee. Dié van Dr Nel van Heerden? Madelie

...
07.04 | 09:09

Kan iemand dalk sê die datums klop nie... Die datums wat op foto's is en die ouderdom wat sy behoort te wees, werk nie lekker saam nie. Kan iemand dalk help?

...
You liked this page