Om alleen te wees in London

Hoekom nie?

As die reisgogga jou gebyt het en dit ‘n passie word, sukkel ‘n mens soms om ‘n toermaat te kry wat dieselfde plekke as jy wil sien.  Wanneer dit met jou die geval is, gaan reis dan alleen.  Hoekom nie?

 Ja, dis heerlik om al die nuwighede en dinge saam met iemand te beleef, maar om alleen te reis het darem ook sy voordele.  Dink net, jou tyd is jou eie.  As jy lus voel om vir twee ure lank na een swaan te sit en kyk, kan jy dit doen en as jy die  aand moeg is en voor sewe in die in die bed wil klim, doen dit dan   – jy hoef niemand in ag te neem nie.  Veral in Brittanje is dit regtig nie moeilik om alleen te reis nie, `n mens verstaan mos darem Engels, of hoe?

Hoe gaan mens te werk?

Onthou dat dit duurder is om alleen te reis, want jy moet vir alles voluit betaal.  Dink veral hier aan koste van verblyf en uitgawes op taxis.  Soek `n bietjie op die internet rond, want in die winter, vroeë lente of laat-herfs, dus buite die normale toeriste seisoen, is daar heelwat hotelle wat groot afslag aanbied as jy vroeg bespreek, veral die duurder viersterhotelle in London.  Verlede jaar gedurende die winter, het sommige van hulle tot 60% afslag aangebied. 

Ek doen al my hotelbesprekings self deur die internet.  Webtuistes soos Tripadvisor, gee inligting oor goeie hotelle.  Tripadvisor plaas ook resensies van gaste wat van hierdie hotelle gebruik gemaak het.  Dis altyd goed om te weet hoe hoog of laag ander toeriste `n plek aanslaan voor jy bespreek.

 In die sentrale deel van London is daar nie eintlik gastehuise (bed and breakfasts), nie.  Op die platteland is daar baie, maar onthou net as jy vrou alleen is om seker te maak dis `n veilige plek.  Hierdie gastehuise, soms ook genoem house hotels, is in baie gevalle ou herehuise wat omgebou is as hotelle.  Die enkelkamers is gewoonlik in die nok van die dak op die derde of vierde vloer, met steil en smal trappies om uit te klim.  Hysers is maar ‘n skaars kommoditeit in hierdie tipe verblyf.  Onthou ook, as jy alleen is moet jy alles self dra – pak dus lig. ‘n Mens kan ook net die nodigste in `n oornagsak pak en jou groot tas by ontvangs laat toesluit.

Vir `n vrou alleen op toer is die maklikste en gerieflikste om in London tuis te gaan en dan dagtoere en uitstappies per trein te onderneem.  Daar is egter georganiseerde dagtoere beskikbaar wat Bath, Oxford, die Cotswolds en plekke soos Stratford-Upon-Avon, Stonehenge en selfs Parys insluit.  Ek het op my eie al daguitstappies na Whitstable (‘n vissersdorpie in Kent), Portsmouth, Winchester, Worcester, Windsor, Oxford, Cambridge, Chester en Canterbury gedoen.   

Waar bly mens oor?

My gunsteling hotel in London is die Hotel Imperial by Russell Square.  Dis `n eenvoudige, driester toeristehotel.  Die voordeel van die Imperial is dat jy by Heathrow direk op die moltrein klim wat die Piccadilly-roete volg en onder andere by Russell Square stop.  Die Imperial is maar sowat honderd en vyftig meter vanaf die moltreinstasie.  Jy het dus nie `n taxi nodig om by die hotel uit te kom nie.  Glo my, dit maak die lewe baie makliker en jy spaar heelwat.  Die Imperial het `n groot binnehof en as jy vroegtydig bespreek kan jy vra vir `n kamer wat op die binnehof uitkyk.  Dit sluit nogal baie van die lawaai van London se verkeer uit.  Daar is darem heelwat ander hotelle ook in verskillende prysklasse naby Russell Square – jou keuse is dus groot.

 

 Nog `n voordeel van die Imperial is dat dit direk op die park by Russell Square uitkyk.  Dis lekker om `n bietjie groenigheid te sien, en in die herfs veral is die park `n prentjie!  Russell Square moet sekerlik een van die mooiste parkies in London wees.  Die sagte ligkwaliteit is iets besonders.   Die akteur van When Harry met Sally, Billy Crystal, het een middag laat langs my op die bank kom sit en hom verwonder aan die mense en die ongelooflike atmosfeer.  Ek gaan stap graag vroegoggend in London, wanneer dit net ek en die skoonmakers is en geniet dit dan om later in die park te sit en die mense dop te hou.  Daar is `n ook ‘n restaurantjie in die park wat wéet van koffie maak!

Russell Square Park in die herfs
...en in die somer

Hoe beweeg mens rond?

Die Britse Museum is net om die draai van Russell Square.  Trouens, Piccadilly Circus en Covent Garden is beide op die Piccadillyroete gelëe en dus naby die teaters.  Daar is ook `n gewone busstop en `n stop vir die oop-top bustoere.  Taxis is volop – ek het nog nooit langer as vyf minute vir een gewag nie.    

‘n Mens kan deesdae wanneer jy aansoek doen vir `n Britse visum, al jou Oysterkaart koop.  Dit is `n debietkaart waarop jy vooraf `n bedrag geld laai en dan trek jy net jou kaart deur die meter by die moltreinstasies.  Dis ook heelwat goedkoper as om vir elke rit `n kaartjie te moet koop.  Die Oysterkaart geld vir die moltrein, bo-grondse treine en busvervoer.  Dit sluit egter nie die oop-top busse soos dié van Orginal Bus Tour Company in nie.

 ‘n Oop-top bustoer is `n moet vir almal wat vir die eerste keer London besoek.  Dit dek verskillende roetes, en doen by al die beste besienswaardighede aan.  Jy kan afklim net waar jy wil en daar is elke tien minute `n bus by elke stop.   Ek en my dogter, Susan, het op ons eerste besoek aan London in die laat-herfs, net halfprys betaal en toe sommer die oop-top busse vir die meeste van ons vervoer gebruik.  Die busse verskaf almal lopende kommentaar deur `n gids of deur middel van ‘n bandopname.  So ‘n buskaartjie sluit ook `n boottoer op die Teems na Greenwich in.  ‘n Mens vaar dan verby die Tower of London,  St Pauls-katedraal en onder deur Tower Bridge.

Oop-top bus
London bus
London taxi - ook in ander kleure as swart

Om te stap in London

Daar kan min dinge lekkerder en interessanter wees as om dou voor dag, wanneer dit nog stil is,  in die strate van London te gaan stap.  Dis dan net jy en die skoonmakers en taxidrywers.

So ontdek mens klein juweeltjies wat jy weer en weer wil sien  - die mooiste klein straatjies en winkeltjies en die tipiese London huise en apartmentblokke.

Of koffie te drink in 'n park of straatkafeetjie en almal dop te hou wat werk toe op pad is of met hulle honde gaan stap, of 'n koerant te sit en lees en sommer net die atmosfeer te ervaar.

London se straatatmosfeer

As jy alleen wil reis, onthou net die volgende:

  • Sorg dat jy ten minste twee opsies het om geld te trek en bêre die kaarte op  verskillende plekke;
  • Om alleen te reis kos duurder want jy moet vir alles voluit betaal;
  • Hou fotostate van jou paspoort, visum, mediese versekering en hotelverblyf in elke stuk bagasie, jou handsak en aan jou lyf;
  • Gee jou bank vroegtydig  kennis dat jy jou kaarte in die buiteland gaan gebruik en sorg dat jy die korrekte viersyfer pinnommers het;
  • Laai ekstra lugtyd op jou selfoon, maak seker dat dit “roaming” is en dat jy dit dus oorsee kan gebruik.  Vind ook uit wat die kode is om vanaf die buiteland na Suid-Afrika toe te kan skakel;
  • Gaan eet vroeg in die aand of maak jou hoofete van die dag, middagete;
  • Pak lig, daar is niemand om jou te help dra nie;
  • Al is jy op jou eie, werk vir jou ‘n volledige reisplan uit en hou daarby en gee afskrifte daarvan aan familielede tuis;
  • Maak seker dat jy al jou kwitansies saamneem as jy deur die internet besprekings en betalings gedoen het;
  • Reis buite spitstye en buite seisoen want dit is goedkoper.

Lekker reis!

Madelie

Write a new comment: (Click here)

SimpleSite.com
Characters left: 160
DONE Sending...
See all comments

| Reply

Latest comments

06.05 | 19:10

...
05.05 | 20:47

Het baie geniet. Dankie.Tuinmaak my passie. Meestal onbekende musiek vir my, maar pragtig.

...
07.04 | 20:46

Hi Nalene, watter datums het jy 'n probleem mee. Dié van Dr Nel van Heerden? Madelie

...
07.04 | 09:09

Kan iemand dalk sê die datums klop nie... Die datums wat op foto's is en die ouderdom wat sy behoort te wees, werk nie lekker saam nie. Kan iemand dalk help?

...
You liked this page