Namiddagtee soos die Engelse dit doen

Almal wat Brittanje besoek moet verseker ‘n deftige namiddagtee, die sogenaamde high tea beproef.  Ek en Susan was gelukkig om seker die toppunt van grasie en elegansie te kon beleef toe ons so ‘n tee by die Ritz Hotel gaan geniet het. 

Tee by die Ritz

Dit was ‘n belewenis.  Alles was uit die boonste rakke, met net die mooiste blomme en duurste porselein en silwer waarin jy bedien word, die pianis wat dromerige musiek speel en die asemrowende ambience van die Ritz. ‘n Mens kan kies uit sestien soorte tee (onder andere red bush), en net soveel soorte koffie.  Elke gas word in sy eie silwer tee-of koffiepot bedien.  Die eetgoed word bedien op ‘n swaar silwer drievlak koekstaander met fyn komkommer- en ander souttoebroodjies op die onderste vlak, heerlike vars botterbroodjies met room en konfyt in die middel en die ongelooflikste mooi en delikate petit fours  elkeen op sy eie koperplaatjie op die boonste vlak. 

Binne die Ritz eetkamer.

Was dit goeie waarde vir geld?  A ja a, want dit gebeur nie aldag dat ‘n gewone mens so ‘n geleentheid kry nie.  Kyk maar na die foto van die eetlokaal en besluit self.

Die eetkamer soos op die Ritz se webwerf