Windsor en Eton College

Windsorkasteel op die heuwel

Een van die dag-uitstappies in Engeland wat ek nog die meeste geniet het, was ‘n besoek aan Windsor en Eton – Susan en ek het dit ‘n paar jaar gelede gedoen.  Dit is maar so veertig minute per trein vanaf London.

Windsor is `n pragtige middeleeuse dorpie met Windsorkasteel op die heuwel wat troon oor die dorp. 

Die kasteel self is al meer as nege honderd jaar oud en dus die oudste en die langs-bewoonde kasteel in die wêreld.   Die kasteel lyk binne soos alle herehuise maar lyk, met pragtige plafonne, gordyne, mooi meubels en ornamente, en hope skilderye van voorgeslagte. 

Die St George’s-kapel vorm deel van die kasteel.   ‘n Mens kan Sondae daar dienste bywoon, asook Evensong elke middag.  In die kapel is die grafkelders van die huidige koningin se pa en ma en suster Margaret.

"n Mens loop ook hier letterlik bo-oor Henry VIII - hy is onder die kerkpaadjie begrawe.  Nogal 'n lekker gevoel - sy verdiende loon - hy wou mos lelik wees met sy vroue!

Eton College

Die dorpie Eton, grens aan Windsor.  Eton College, gestig in 1440, staan bekend as een van die beste en bekendste privaatskole in die wêreld en het al negentien Britse premiers opgelewer.  Op die oomblik word drie van die belangrikste poste in Brittanje beklee deur oud-leerlinge:  David Cameron, die huidige premier, Boris Johnson die burgemeester van London en Justin Welby die Aartsbiskop van Kantelberg (Canterbury) en dus die hoof van die Anglikaanse kerk.  So ook Prinse William en Harry.    

Eton se binneplein

Eton College word sekere tye van die jaar oopgestel vir besoekers.  Ons was gelukkig om dit te kon besoek gedurende die Britse somervakansie.   Eton is werklik ‘n klein wêreldjie op sy eie.  Die onderwysers staan onder die seuns bekend as beaks en Eton het deur die eeue selfs sy eie sportsoort, die Eton wall game, ontwikkel. 

Hoewel dit op die oomblik een van die duurste skole ter wêreld is, sowat R450 000 per jaar, is die skool oorspronklik deur Koning Henry V1 gestig vir minder-bevoorregte kinders.  Een van die oorsponklike klaskamers kan deur besoekers besigtig word.  Deur die eeue heen het die seuns, soos kinders nou maar maak, hulle name uitgekrap op die houtpanele en banke.  Bekendes soos Byron en Shelley se name kan gesien word.    

Ons gids was ‘n oud-onderwyser van Eton en hy kon baie onderhoudend vertel van die seuns en hulle dinge.  Eton is bekend vir sy kapelkoor en sy uitstekende geriewe.  Die roei- items gedurende verlede jaar se Olimpiese Spele is byvoorbeeld by Eton Dorney gehou, die skool se oefenplek vir roeiers.

Al is Eton so ‘n duur en deftige skool, was die dele van die skool wat ons gesien het maar baie Spartaans.  Veral die binnehof voor die kapel is absoluut ‘n verlate stuk grond.  Ek neem aan die moderne deel van die skool is aansienlik luukser en geriefliker. 

Een maal per jaar gedurende die somer, hou die seuns `n bootoptog op die Teems wat langs die skool verby vloei terwyl die Boating song gesing word. 

Die seuns dra nog regte manelpakke as skooluniform – gelukkig is die keile darem al afgeskaf.  Maar moenie dink hulle is sissies nie, hoor, soveel as negentien oud-leerlinge het al die Victoria Cross-medalje ontvang – die hoogste militêre toekenning vir dapperheid in Brittanje. 

‘n Besoek aan Eton is beslis die moeite werd!